FIN DE CURSO

      Queridos nenos e nenas:

   Esta foi a derradeira sesión de psicomotricidade deste curso; un curso atípico que permanecerá na nosa memoria para sempre e que, de seguro, nos fixo aprender unha gran lección.

  A aqueles que seguides en Educación Infantil, dicirvos que nos vemos o curso que ven. Estareivos agardando cos brazos abertos e chea de xogos para compartir.

     Aos que pasades para Primaria, dicirvos que foi un pracer ser a vosa profe. Sodes uns nenos e nenas incribles e  todos e cada un de vos deixa unha pegada importante no meu corazón. Espero que na nova etapa que ides iniciar teñades moita sorte e estou segura de que ides lograr todo o que vos propoñades. Non renunciedes nunca a loitar por acadar as vosas metas porque, con ilusión e esforzo, todo é posible. Non deixedes nunca de soñar, de voar, de xogar e aínda que medredes, non deixedes nunca de ser nenos.

      Que pasedes un feliz verán.

      Un biquiño.

      Mª José Fernández.

OLLOS XOGUETONES

  Seguimos traballando a motilidade ocular, tan importante para a aprendizaxe da lecto-escritura.

 BALÓN DE LETRAS

Colleremos unha pelota e escribiremos nela diferentes letras. O neno/a estará colocado moi próximo á unha parede na que teremos marcada cunha cinta adhesiva unha cruz. O neno/a lanzará coas dúas mans a pelota contra a parede tratando de darlle á cruz. Cando volva  coller a pelota, terá que dicir o nome da primeira letra que vexa.

MIRANDO AO LONXE

Para esta actividade necesitaremos seis pauciños depresores ou tiras de cartoliña. Nun dos extremos de cada pauciño debuxaremos un círculo e pintarémolo dunha determinada cor. O neno/a estará de pé. Colocarémoslle o depresor moi preto dos ollos e pedirémoslle que mire para el. Pouco a pouco iremos alonxando o pau  ata máis ou menos 30  centímetros. É agora cando lle pediremos ao neno/a que nos diga cal é a cor que está pintada no depresor. Repetiremos a operación con cada un dos depresores. 

EQUILIBRISTAS

   Na sesión de hoxe imos continuar traballando un pouquiño o equilibrio. Para iso anímovos a practicar realizando tres xogos.

COLORÍN, COLORÍN

Para este xogo precisamos atar case a ras do chan, unha cordiña con papeis de diferentes cores colgando. O neno/a colocarase próximo á corda e terá que tocar tantas veces como lle digamos, o papeliño da cor que indiquemos. Por exemplo: toca a cor amarela tres veces. O neno/ a levantará o pé dominante e tocará tres veces seguidas, sen pousar o pé no chan, o papeliño amarelo. Repetiremos coas diferentes cores e cando rematemos, faremos que o neno/a o intente co outro pé.

CARREIRA

Coa axuda de dúas macetas de plástico e varios globos pequenos cheos de auga imos realizar o seguinte xogo. Ataremos nos pés do neno/a as macetas segundo se indica na imaxe. Trazaremos un percorrido e nun extremo do mesmo colocaremos un montón de globos. O neno/a terá que coller coas mans dous globos e colocalos en cadansúa maceta. Fará o percorrido camiñando e ao chegar á meta deixará os globos noutro recipiente pero sen collelos coas mans. Esta vez terá que levantar os pés  para depositar os globos no novo recipiente.

CAMIÑATA SOBRE CHURRO

Agora imos necesitar un churro de piscina. Colocarémolo sobre o chan e o cativo deberá camiñar descalzo sobre el mantendo o equilibrio.

MUXINDO VACAS

  Ola! Como estades? Espero que ben.

  Para seguir traballando a motricidade fina, hoxe propóñovos unha serie de xogos moi divertidos.

MUXINDO VACAS.

Para este xogo ides precisar unha luva de látex (desas dun só uso). Pedídelle a papá ou a mamá que a enchan con auga e que coa axuda dunha agulla lle fagan un pinchaciño na punta dos dedos. Agora vós teredes que imaxinar que estades diante dunha vaca e ... MANS Á OBRA!!!, teredes que muxir a luva.

NA BUSCA DO TESOURO

Para o seguinte xogo necesitaredes un recipiente no que mesturaredes  fariña e garavanzos. Coa axuda dun coador, teredes que separar os garavanzos da fariña peneirando ( o neno/a tratará de non mover todo o brazo, só a man). Cando teñades uns poucos garavanzos no coador, teredes que collelos cos dedos dun en un e metelos pola boca dunha botella ( canto máis estreita sexa a boca da botella moito mellor).

O DISCO DE NEWTON

Para rematar déixovos un vídeo para que, coa axuda dos vosos papis por suposto, fabriquedes un disco moi divertido co que poder xogar e mellorar moito a vosa motricidade fina. Espero que o pasedes ben.

IOGA COS ANIMAIS DO MAR

   E para rematar a semana...!, algo de relaxación. Hoxe axudaranvos uns simpáticos animaliños que sairon das profundidades do océano. 

            BOA FIN DE SEMANA!

O DRAGÓN

    Ola! Aquí vos deixo un vídeo cunha serie de praxias e movementos bucofaciais para exercitar a musculatura da nosa cara e así mellorar a nosa pronunciación.

       Para rematar, propóñovos que, coa axuda dos vosos papás, fagades este dragón. Con el poderedes xogar e ademais practicar o sopro.

O BAILE DO MOVEMENTO

ESTATUAS

   Hoxe imos traballar un pouquiño o equilibrio. Nos nenos/as, o equilibrio influe na forma de percibir o mundo que os rodea, as relacións sociais e a súa propia autoestima. Se un neno/a ten problemas de equilibrio, a súa capacidade de atención verase afectada e polo tanto o seu rendemento escolar.

1. Estatuas: o papá ou a mamá fará soar un instrumento musical de maneira continuada ( se non temos ningún instrumento, podemos empregar calquera obxecto que produza son ao tocalo). Mentres, o neno/a moverase libremente polo espazo. Cando o instrumento deixe de soar, o neno/a deberá permanecer quieto adoptando unha postura determinada. Repetiremos a dinámica e cada vez a postura terá que ser diferente.

2. Empurrón: este xogo é moi parecido ao anterior. Diferenciase en que o neno/a non terá que adoptar ningunha postura, só quedarse quieto. Nese momento, o papá ou a mamá daralle un lixeiro empurrón. O neno/a non poderá mover, en ningún momento, os pés do chan.

3. O bailarín: consiste en poñerse en posición de bailarina, é dicir, cos brazos en alto e unidos polas mans, mentras unha das pernas se apoia na contraria co pé no xeonllo. 

4. Camiñando sobre a liña: trazaremos no chan unha liña con cinta carrocera. Primeiro, o neno/a  camiñará sobre a liña colocando un pé diante do outro. Despois, realizará o mesmo percorrido pero esta vez levando nas mans un pau cuns aneis nos extremos.

PULSO CHINO

   As mans son  esa parte tan esencial da nosa anatomía que serven para case todo o realmente importante: crear, contar, tocar, escribir… XOGAR. Por iso hoxe vou  presentarvos tres xogos nos que o único material que imos precisar serán as nosas mans. Pasaremos un bo rato e ademais desenvolveremos certas destrezas que nos axudarán a ter unhas mans moito maís áxiles.

1. Pulso chino: Consiste en atrapar co dedo polgar o polgar da túa parella, como se pode ver na imaxe.

2. Piedra, papel, tijera: A pedra vence á tesoira rompéndoa, a tesoira vence ao papel cortándoo e o papel vence á pedra envolvéndoa.

3. Quentamans: Debemos colocarnos fronte ao noso contrincante coas nosas palmas das mans cara arriba mentres que o outro xogador colocará as súas enriba das nosas e cara abaixo.  O xogo é moi sinxelo. Terás que sacar as túas mans tan rápido como para poder golpear o dorso das mans do teu despistado contrincante.

A CARRETILLA

 Nas actividades da sesión de hoxe traballaremos a musculatura dos brazos e das mans e tamén a súa coordinación.

1. 

  Colocaremos no chan varias liñas con cinta carrocera, segundo se indica na imaxe. O neno/a colocarase cos pés na primeira das liñas, dobrará o corpo pola cintura e levará as mans ata os pés. Pouco a pouco irá avanzando coas mans por cada unha das liñas ata chegar á derradeira e estar case estirado. Por suposto, os pés non se poderán mover. Nesa última posición aguantará uns segundos e regresará novamente á posición inicial (repetirá tres veces).

2.

    Agora colocaremos no espazo que hai entre a terceira e a cuarta liña un recipiente e ao lado unhas cantas pelotiñas de plástico ou calquera obxecto similar. Mandarémoslle ao neno/a repetir o exercicio anterior pero esta vez, cando chegue coas mans á terceira liña, quedará alí quieto e terá que coller cada unha das pelotiñas coa man dominante e metelas dentro do recipiente. Unha vez feito, regresará á posición inicial. Repetiremos a actividade, agora empregando a outra man. É moi importante que durante o exercicio o neno/a non estea nunha posición moi forzada. Fixádevos na posición que ten o neno da imaxe, esa é a correcta.

3. CARRETILLA.

  Por último, coa axuda dun adulto, o neno/a realizará a carretilla. É importante visualizar o vídeo porque nos indica como facelo de maneira correcta para que o neno/a non lesione nin a columna nin a zona lumbar.

MOVENDO DEDOS

Seguimos movendo as mans e os dedos. Ánimo!

1. QUECEMENTO:

a) Carreira de dedos: 

b) Engurrando a tea: Estenderemos no chan un fular. O neno/a colocará os dedos enriba dun dos extremos do fular e irá movéndoos de maneira que todo o fular vaia camiñando cara ese extremo ata que se xunte todo.

c) Facendo pelotas de papel:

2. XOGO:

Para este xogo necesitaremos un barreño con auga, unhas figuriñas flotantes e un pulverizador. Co pulverizador, o neno/a deberá intentar mover as figuriñas sobre a auga.

TOMANDO AIRE.

  Aquí vos deixo unha canción da banda sonora da película Ballerina coa que nos imos relaxar. 

  Deitádevos no chan. Os vosos pés estarán apoiados no asento do sofá ( só os pés, as pernas  estarán no aire). Os brazos estarán relaxados ao longo do voso corpo. Mentres escoitades a música, ides imaxinar que estades no medio dun inmenso prado de herba verde. Sentídesvos libres. Respirades aire fresco. Estendedes os vosos brazos e  imaxinades que corredes, voades, saltades, soñades....

PERRUCAS

       Hoxe imos xogar a ser perruqueiros, que vos parece?

MATERIAIS:

• Folios.
• Un lapis.
• Témperas de cores.
• Un vaso.
• Un pincel.
• Unha pouquiña de auga.
• Unha palliña.

  Nun folio, debuxaremos unha cara. Lembrade; ten que ter dous ollos, un nariz, unha boca e dúas orellas. Sempre lle debuxamos pelo pero esta vez, non. Cando teñamos a nosa cara debuxada, na zona do pelo e coa axuda dun pincel, deixaremos caer unhas pinguiñas de témpera diluida nunha pouquiña de auga. Despois, colleremos a palliña e sopraremos enriba de cada pinguiña para así debuxar o pelo.

  Deste xeito, ademais de conseguir uns debuxos moi graciosos, estaremos fortalecendo os músculos da nosa cara e así conseguiremos mellorar a nosa fala.

O BAILE DO CORPO

A MOVERSE!

      Hoxe déixovos un vídeo cun montón de ideas coas que se poden traballar diferentes ámbitos da psicomotricidade. Son moi divertidas. Escollede aquelas que máis vos gusten e a desfrutar.

FÚTBOL DE DEDOS

    Ola! Que tal a fin de semana? Espero que desfrutarades un pouquiño do bo tempo e xogarades ao aire libre.

  Para hoxe propóñovos que animedes aos vosos dedos a botar un partido de fútbol. Da mesma maneira que fan os xogadores antes de saír ao campo, os nosos dedos deberán facer un quecemento.

1. QUECEMENTO: 

  

Abrimos e pechamos con forza as mans.

Agarramos o pulso e movemos a man para arriba e para abaixo     ( o brazo non  se move).

Agarramos a man pola palma e empuxámola cara o brazo.

Colocamos as mans en posición de orar e despois rotámolas cos dedos apuntando ao fronte.

Coas mans en posición de orar, movémolas cara un lado e cara o outro.




Coas mans unha pegada na outra, facemos forza cara o punto de unión.







Axitamos as dúas mans.






Estiramos o polgar.







Estiramos cada un dos dedos.

  Unha vez feito o quecemento, os nosos dedos xa están listos para saír xogar. Bueno, é imprescindible ter un terreo de xogo. Dicídelle a papá ou a mamá que volo preparen  coa axuda dun xiz e dunhas cantas chapas.

2.FÚTBOL DEDO: teredes que marcar goles coa axuda dos vosos dedos índice e polgar. Fixádemos na imaxe.

RESPIRA.

     Ola! Como estades? Espero que tanto vós como as vosas familias esteades moi ben. Eu desexando vervos moi pero que moi pronto. Bótovos moito de menos.💖💗💗💖

     Hoxe déixovos un conto que vos ensinará diferentes formas de respirar e estas formas de respirar axudaranvos a estar máis relaxados e tranquilos. Escoitade o conto con atención e despois escollede aquelas maneiras de respirar que máis vos gustaron e ... A RESPIRAR!!

OLLO!!!

   Para hoxe propóñovos dúas actividades coas que seguiremos traballando a motilidade e coordinación ocular.

1. ACTIVIDADE 1: esta é unha actividade de equilibrio para a que é fundamental manter a mirada fixa nun punto determinado, neste caso a pelota.

                                              

Como vedes, necesitaremos un cilindro do papel hixiénico e unha pelotiña de plástico. O neno/a deberá percorrer unha distancia sostendo o cilindro na man sen que a pelota caia ao chan.

2. ACTIVIDADE 2: nesta actividade unha boa coordinación entre os dous ollos é máis que imprescindible para que o neno/a consiga meter a boliña polo burato. 

                    

CIRCUITO DE SALTOS

      Estades listos para saltar?

  Dicídelle a papá e a mamá que con cinta carrocera vos preparen no corredor da vosa casa un circuito coma o do debuxo.

                                       

    Teredes que saltar para ir avanzando polo circuito e os vosos pés deberán caer xusto enriba das liñas vermellas. Procurade que os dous pés caian ao mesmo tempo. Para que vexades mellor a dinámica da actividade, déixovos un vídeo.

A PESCAR!

      Os xogos de pesca son ideais para a estimulación psicomotriz dos máis cativos debido á concentración e á precisión que precisan para lograr pescar. Ao mesmo tempo, este tipo de xogos axudaralles a ser máis pacientes e a desarrollar o pulso. Polo tanto ....  HOXE IMOS PESCAR!!!!   

1. Para iso necesitaremos que os papás nos impriman uns peixiños coma estes.

2. Nós, para practicar coas tesoiras, recortarémolos. 

3. Lembrade como se facía.

4. Despois, poñerémoslle a cada peixe un clip.

5.  Ademais, os nosos papis deberán facernos unhas canas de pescar cun pauciño, un fío e un imán.

6.  Cando teñamos todo listo, xa podemos poñernos mans á obra... A PESCAR! QUE PESQUEDES MOITO!

MOTILIDADE OCULAR 2

     Hoxe retomamos algúns exercicios que nos axudarán a  mellorar a coordinación entre os dous ollos.

     Empezaremos vendo un vídeo no que aparece un puntiño negro. Teredes que seguilo cos dous ollos sen mover a cabeza. É un pouquiño difícil pero hai que intentalo.

     Agora déixovos unha actividade semellante a outra que xa fixemos. Presentarémoslle ao neno/a unha lámina como a seguinte e pedirémoslle que mova as dúas fichas á vez sobre as liñas debuxadas.

A MOVERSE!!!!

XOGANDO CON GLOBOS

    Collede aire, inflade un globo e xogade con el.

• Golpeade o globo cunha man mentres a outra man está descansando dentro dun bolsillo. Tratade de darlle todo o rato ao globo evitando que caia ao chan. Despois dun anaco, faredes o mesmo pero agora coa outra man.
• Golpeade o globo alternando as mans ( un golpe primeiro cunha man e o seguinte golpe coa outra).
• Ides facer o mesmo que estivestes facendo coas mans pero agora cos pés. Golpeade o globo primeiro só cun pé. Despois só co outro e finalmente alternando os dous pés.
• Golpeade o globo coa cabeza.

DEDO DEDIÑO

   Ola! Como estades? Espero que desfrutando a tope desa hora na que podedes  xogar e correr ao aire libre. Pero como o día é moi grande, propóñovos algunhas actividades coas que seguir traballando na casa un pouquiño a motricidade fina.

    O primeiro é un video cunha representación moi divertida. Intentádea facer cos vosos dediños.

     Agora, empregando as tesoiras recortaredes tiras de papel. Os vosos papás que vos preparen unha reixa cunha cartoliña como a da imaxe. Vós teredes que ir entrelazando as diferentes cintas. Xa veredes que bonito queda.

CON SABOR DOCE.

        Aínda que todos sabemos que as chuches non son NADA BOAS para a nosa saúde, hoxe imos facer unha pequena excepción porque imos precisar dalgunhas para levar a cabo as diferentres actividades propostas. Con elas  trataremos de mellorar a mobilidade dos beizos, da lingua e da mandíbula e adquirir tono en toda a súa musculatura.

• Cun pau tipo MiKado:

• Con nocilla:

      Untaremos os beizos do neno/a cunha pouca nocilla. Coa lingua terá que limparse totalmente.

• Cun chupa:

   Colocaremos o chupa próximo á boca do neno/a ( por diante, por un lado, polo outro lado, cara arriba). Este deberá sacar a lingua e tratar de tocar o chupa coa punta. Trataremos de que lle coste e teña que estarricar bastante a lingua para chegarlle. 

• Cun verme de gominola:

     O neno/a agarrará cos beizos un verme de gominola por un dos seus extremos. Nós agarrarémolo polo outro extremo e tiraremos por el. O neno/a deberá facer forza para non quedarse sen verme.